Од Будинарци до светско признание: Вангелина Пармачка е една од 100. жени херои на ФАО

Вангелина Пармачка, сточарка и производителка на традиционално овчо сирење од Македонија е меѓу жените кои Food and Agriculture Organization of the United Nations (FAO) ги одликува за нивниот исклучителен придонес во земјоделството, прехранбените системи и руралниот развој, информираа од Канцеларијата на Обединетите Нации (ОН) во земјава.

Заедно со своето семејство, таа се грижи за стадото и за секој чекор од производството – од одгледувањето на овците до преработката и продажбата на сирењето. Со својата работа го зачувува традиционалното знаење и покажува како локалните вештини можат да создаваат можности за руралните заедници.

Нејзиното лидерство оди и подалеку од сопственото стопанство. Како координаторка на Мрежата на жени фармери при Национална федерација на фармери – National Federation of farmers – NFF, таа се залага за посилни права, поголема видливост и подобра поддршка за руралните жени.