ЕУ воведува нови правила за храна: Построги декларации, еколошка амбалажа и можен раст на цените

Европската Унија повторно ги менува правилата на пазарот на храна, со нов пакет регулативи што ќе важат не само за земјите членки, туку и за сите компании кои извезуваат на европскиот пазар. Целта е поголема заштита на земјоделците, построги стандарди за означување и поголема транспарентност во синџирот на снабдување.

Една од најзначајните новини е забраната за користење називи како „сланина“ или „стек“ за производи што не содржат месо. Со тоа, европските институции сакаат да спречат забуна кај потрошувачите и појасно да ги разграничат производите од животинско и растително потекло.

Покрај декларациите, сè поголем фокус се става и на заштитата на животната средина. Се најавуваат промени во пакувањето на производите, со намалување на употребата на пластика и постепен премин кон биоразградливи материјали.

Експертите предупредуваат дека ваквите измени ќе бараат дополнителни инвестиции од производителите, па затоа нема да стапат во сила веднаш. Сепак, тие оценуваат дека влијанието врз цените на храната е речиси неизбежно.

Според нив, покрај новите регулативи, дополнителен притисок врз цените создаваат и поскапувањето на енергијата, ѓубривата и транспортот, што директно се одразува на конечната цена на производите.

Во исто време, глобалните кризи повторно ја отворија темата за домашното производство на храна. Аналитичарите оценуваат дека државите мора да инвестираат во сопствено производство, бидејќи безбедноста на храната веќе не е само економско, туку и стратешко прашање.