Раст на цените во грчките супермаркети во март

Инфлацијата во синџирите супермаркети во Грција во март 2026 година, во споредба со март 2025 година, изнесувала околу 2,4%, покажуваат податоците на грчкиот Институт за истражување на малопродажба на стоки за широка потрошувачка (IELKA).

Индексот на цените во март, во споредба со претходниот месец, бил понизок за 0,15%, додека на годишно ниво, од април 2025 до март 2026 година, забележал раст од 1,62%.

Најголем раст на цените во март 2026 година, во однос на истиот месец лани, е регистриран кај сувомеснатите производи (12,70%), свежото овошје и зеленчук (10,45%), свежото месо (9,89%), деликатесните производи (5,73%) и храната за доенчиња и бебиња (5,71%).

Зголемувањето на цените кај сувомеснатите и деликатесните производи се поврзува со сезонски фактори, додека растот кај свежото овошје и зеленчук главно се должи на временските услови во јануари и февруари.

Најголем пад на цените во овој период е забележан кај детергентите и средствата за чистење (4,47%), храната и производите за домашни миленици (4,07%), прехранбените производи (1,96%), замрзнатите производи (1,67%), како и хартиената галантерија, козметиката и производите за лична нега (1,66%).

Од Институтот посочуваат дека забележаните намалувања се резултат на нормализација на пазарот и намалување на производствените цени кај одредени производи.