„Краш“ инвестира 2,3 милиони евра во автоматизација на производната линија

Компанијата „Краш“, во рамки на поширок инвестициски циклус насочен кон унапредување на производните процеси, зголемување на ефикасноста и зачувување на свежината на производите, инвестираше 2,3 милиони евра во нова линија за автоматско редење и пакување на своите Choco Napolitanke.

Линијата е развиена и имплементирана во соработка со реномиран германски производител на опрема за пакување во прехранбената и фармацевтската индустрија.

„Новата, модерна и модуларна линија за Choco Napolitanke обезбедува пакување што ја зачувува свежината и визуелниот изглед на производот и гарантира конзистентен и уедначен квалитет. Со херметичкото пакување, Choco Napolitanke ја задржуваат својата структура и крцкавост, што е клучно за искуството на потрошувачите“, изјави Иван Кос, член на Управата на „Краш“ задолжен за производство, инвестиции и одржување.

Од компанијата посочуваат дека инвестицијата придонесува за раст на продуктивноста и оптимизација на работните процеси, при што работата на линијата е физички помалку напорна и главно насочена кон надзор и управување со процесите.

Паралелно со технолошкото унапредување, компанијата спроведе и редизајн на амбалажата, а поради специфичните барања на новото пакување, е прилагодена и грамажата на производите.

Воведен е и нов, помал формат од 108 грама, кој одговара на трендот на практични и подостапни пакувања, а достапен е и во три нови вкусови – малина, портокал и какао со млеко.

Проектот за подготовка и имплементација на автоматизацијата на производната линија за Choco Napolitanke траеше две години, а од „Краш“ најавуваат дека ќе продолжат со модернизација на своите производствени процеси.