АХВ пред Велигден: Казни од 19.000 евра, спречен шверц на 40 тони српски јајца

Инспекциските служби на Агенцијата за храна и ветеринарство (АХВ) спроведоа 1.221 вонредна контрола низ државата во пресрет на велигденските празници. Притоа се изречени вкупни парични казни во висина од над 19.000 евра и е спречена продажба на огромни количини небезбедна храна.

Фокусот на контролите бил насочен кон сите сегменти од синџирот на исхрана, со цел да се спречи пласирањето на небезбедни производи и да се сузбие нелегалната трговија пред празниците.

Огромна пратка јајца: Инспекторите спречиле шверц на повеќе од 40 тони небезбедни јајца со потекло од соседна Србија. Целата количина е нештетно уништена на депонијата „Дрисла“.

Храна од животинско потекло: Дополнително, запленети и уништени се над 272 килограми небезбедна храна, од која најголемиот дел била од животинско потекло.

За време на теренските контроли кај операторите со храна, инспекторите утврдиле низа законски прекршувања и неправилности кои директно го загрозуваат здравјето на потрошувачите:

Нерегистрирани објекти: Дури 7 од контролираните објекти воопшто не биле регистрирани како оператори со храна во Агенцијата.

Лоша хигиена: Кај 13 оператори се утврдени незадоволителни хигиенски и технички услови за работа.

Здравствени пропусти: Три оператори немале извршено задолжителни здравствени прегледи за вработените лица и не ги исполнувале барањата за стручна подготовка за ракување со храна.

За утврдените недоследности, покрај паричните казни од над 19 илјади евра во денарска противвредност, АХВ донесе и 35 решенија за отстранување на неправилностите, а изречени се и 6 официјални опомени.