Wolt пристигна и во Битола: Попусти за нови корисници и промотивен настан за стартот

Технолошката платформа за достава Wolt официјално започнува со работа и во Битола, со што услугата по првпат се проширува надвор од Скопје.

Компанијата соопшти дека граѓаните на Битола преку апликацијата ќе можат да нарачуваат оброци и производи од локални ресторани и малопродажни партнери. За новите корисници се нуди промотивна понуда од 30 проценти попуст на првите две нарачки, како и 14 дена бесплатна достава.

Почетокот на работењето ќе биде одбележан со јавен настан во Јагода мезе бар, во сабота на 18 април од 12 до 16 часот. Посетителите ќе имаат можност да уживаат во пијалаци и закуски, а ќе биде организирано и „тркало на среќата“ преку кое ќе може да се освојат подароци од компанијата.

Од Wolt велат дека проширувањето во Битола отвора нови можности и за локалните бизниси, преку дополнителен дигитален канал за продажба и пристап до поширока база на корисници, како и флексибилни можности за заработка за доставувачите.

„Возбудени сме што го носиме Wolt во Битола и што го продолжуваме нашиот раст во Македонија“, изјави Огњен Љумовиќ од компанијата.

Од компанијата најавуваат дека во следниот период ќе продолжат со ширење на мрежата и во други градови низ државата.

DoorDash, сопственик на Wolt од 2022 година, денес заедно со платформата работи на повеќе од 30 пазари ширум светот.