Синдикалната кошница во април достигна 68.797 денари

Во првите четири месеци од годината, минималната кошничка е зголемена за вкупно 3.305 денари.

Според анализите, едно четиричлено семејство во април има најголеми трошоци за храна и пијалаци – 26.085 денари. За образование се потребни 7.192 денари, додека за домување (станарина, струја, вода и греење) се издвојуваат 6.338 денари. Трошоците за облека и обувки достигнуваат 6.129 денари. Дополнително, за рекреација и култура се потребни 5.592 денари, за транспорт 4.961 денар, за угостителски услуги 4.131 денар, за одржување лична и домашна хигиена 2.667 денари, за комуникации 3.417 денари, а за здравствени потреби 1.185 денари.

Од ССМ нагласуваат дека само трошокот за храна и пијалаци е речиси на ниво на минималната плата, што значи дека таа не е доволна ниту за основните потреби. Според нивните пресметки, за покривање на основните животни трошоци на едно семејство се потребни околу 2,6 минимални плати.

Оттаму потсетуваат дека институциите и работодавците не ги прифатиле барањата за зголемување на минималната плата упатени во јануари и март, туку извршиле усогласување со пораст од 1.667 денари, со што минималната плата достигна 26.046 денари.