Македонска берза одбележува 30-годишен јубилеј

Мисија на Берзата е да обезбеди ефикасно, транспарентно и сигурно функционирање на организираниот секундарен пазар на хартии од вредност во Република Македонија, преку перманентно настојување на сите инвеститори да им обезбеди влез, односно излез од финансиските инструменти со кои се тргува на различните берзански пазари по фер пазарна цена, да им помогне на трговските друштва да привлечат нов капитал за финансирање на нивниот развој и да придонесе за градење доверба во македонскиот пазар на хартии од вредност.

Основачкото Собрание на Македонска берза е одржано на 13 септември 1995 година, а на 28 март 1996 година, во земјава за прв пат заѕвони берзанското ѕвоно и се одржа првиот ден на тргување на Берзата. Почетокот на работата на Берзата го означи тогашниот Претседател на Република Македонија, Киро Глигоров. На Берзата се тргуваше два пати во неделата, во вторник и во четврток.

На 16 октомври 1996 година, Македонска берза беше примена како полноправна членка на Федерацијата на Евроазиски берзи. Во историјата ќе остане запишано дека Македонска берза ја основале 19 правни лица, од кои 13 банки, 3 осигурителни друштва и 3 штедилници.