„Сеинсберис“ постигна договор за продажба на своите осум бензински станици во Северна Ирска на операторот „Гоу Форкортс“, додека компанијата продолжува да ги насочува инвестициите кон својата основна дејност – малопродажбата на прехранбени производи, пренесува Grocery Gazette.
Со овој договор, локациите ќе бидат префрлени на компанијата „Гоу“, која работи во рамките на „ЛЦЦ Груп“, со седиште во Северна Ирска.
Новиот сопственик планира инвестиции во модернизација на објектите и нивно претворање во самопослужувачки бензински станици, со систем за плаќање директно на пумпите.
Осумте локации се наоѓаат во подрачјата Вест Белфаст, Бангор, Балимена, Колрејн, Данганон, Форестсајд, Спрусфилд и Холивуд Ексчејнџ.
Вредноста на трансакцијата не е објавена, а преносот на локациите се очекува да се одвива постепено, објект по објект, во текот на следните шест до дванаесет месеци.
„Сеинсберис“ соопшти дека поради продажбата нема да има отпуштања на вработени.
Работниците што моментално работат на бензинските станици ќе останат вработени во компанијата и ќе бидат прераспределени на работни места во блиските продавници.
Каролин Холројд, директорка на секторот за гориво и киосци во „Сеинсберис“, изјави дека договорот претставува можност за унапредување на бензинските станици преку инвестициите на новиот сопственик.
„Веруваме дека овој договор претставува најдобро можно решение за нашата мрежа бензински станици во Северна Ирска“, изјави Холројд.
Продажбата го означува повлекувањето на „Сеинсберис“ од пазарот за малопродажба на горива во Северна Ирска, иако трговскиот синџир ќе продолжи да управува со своите 12 супермаркети во регионот.
Овој потег доаѓа во период кога „Сеинсберис“ планира да го прошири своето присуство во секторот за продажба на прехранбени производи во Северна Ирска, вклучувајќи отворање два нови супермаркета на локации на поранешни продавници од синџирот „Хоумбејс“.
Отворањето на продавницата во Ома се очекува следниот месец, додека втората локација е планирана во трговскиот парк Crescent Link Retail Park.
„Сеинсберис“ во последните години спроведува поширока стратегија насочена кон инвестиции во својата основна дејност – продажбата на прехранбени производи.
Според последните годишни финансиски резултати, продажбата на прехранбени производи пораснала за 5,2%, додека продажбата на горива се намалила за 8,2%, на 3,6 милијарди фунти.
Компанијата „Гоу“ моментално управува со 26 бензински станици во Северна Ирска и дополнителни 10 во Република Ирска, а преземањето на локациите на „Сеинсберис“ дополнително ќе ја прошири нејзината мрежа.
