„Сапуто“ (Saputo Inc.) најави промени во својата организациска структура, со цел да ја зајакне способноста за спроведување на стратешките приоритети, да го унапреди комерцијалното работење во сегментот на состојки, да ја забрза трансформацијата на компанијата и да го поддржи понатамошното проширување на својата платформа за состојки.
Како што истакнуваат од компанијата, промените ја одразуваат континуираната посветеност на „Сапуто“ кон развојот на работењето, со цел да одговори на променливите потреби на купувачите, потрошувачите и пазарите, истовремено подобрувајќи ја организациската флексибилност и ефикасноста во спроведувањето на деловните активности.
„Како што „Сапуто“ продолжува да го развива своето портфолио и да инвестира во можности за раст, важно е нашата организациска структура да се развива заедно со нашето работење. Овие промени имаат цел да го зголемат организацискиот фокус, да ја зајакнат одговорноста и да го подобрат спроведувањето на клучните стратешки приоритети. Целта е да обезбедиме соодветна структура што ќе ги поддржи нашите идни амбиции и ќе создаде одржлива вредност за нашите засегнати страни“, изјави Карл Колица, претседател и генерален директор на „Сапуто“.
Со оглед на тоа што глобалната побарувачка за млечни состојки со повисока додадена вредност продолжува да расте, „Сапуто“ формира посебна Дивизија за состојки, со цел да ги забрза иновациите, да го зајакне комерцијалниот фокус и да ги прошири можностите на глобалните пазари.
Стив Даглас е именуван за претседател и оперативен директор за состојки, каде што ќе биде одговорен за раководење со комерцијалните, оперативните, иновациските и развојните иницијативи на дивизијата. Даглас истовремено ќе остане претседател и оперативен директор на Млечната дивизија во Обединетото Кралство до завршувањето на претходно најавената продажба на оваа дивизија.
Понатаму, со цел да го поддржи развојот на компанијата и да го забрза усвојувањето нови технологии и начини на работа, „Сапуто“ воведе нова функција – Chief Enterprise Transformation Officer, која ќе ја извршува Хајг Пучигијан.
На оваа нововоспоставена позиција, Пучигијан ќе раководи со интеграцијата на деловната администрација, оперативните финансии и тимовите за информатичка технологија во единствен модел на корпоративни услуги.
Новата структура има цел да ја подобри доследноста, транспарентноста и можноста за проширување на работењето во целата компанија. Со обединување на овие капацитети, „Сапуто“ очекува да ги поедностави процесите, да ја намали сложеноста, да ја подобри координацијата и да го забрза спроведувањето на активностите.
Истовремено, промените треба да ја поддржат продуктивноста, автоматизацијата и донесувањето одлуки засновани на податоци во сите сегменти од работењето.
Во рамките на организациските промени, Дејв Парадис е именуван за претседател и оперативен директор на Млечната дивизија во Канада.
На оваа функција, Парадис ќе раководи со работењето на „Сапуто“ во Канада, со фокус на спроведување на стратешките приоритети на дивизијата, зајакнување на комерцијалните активности, унапредување на партнерствата со купувачите и поттикнување на оперативната извонредност во целокупното работење.
Од компанијата нагласуваат дека овие организациски промени не ги менуваат стратешките приоритети на „Сапуто“, туку имаат цел да ги подобрат фокусот, одговорноста и ефикасноста во нивното спроведување.
„Во текот на нашата историја, „Сапуто“ постојано се развиваше за да одговори на променливите потреби на нашите купувачи, потрошувачи и пазари. Овие промени го претставуваат следниот чекор во тој развој и ќе ни помогнат да останеме добро позиционирани за конкурентност, раст и создавање вредност и во годините што следуваат“, додаде Колица.
