Промени во раководството на „Капри Сан“

„Капри Сан Груп Холдинг АГ“, со седиште во Швајцарија, соопшти дека Роланд Венинг е разрешен од функцијата извршен директор, како и од сите други должности во компанијата.

Пред да ѝ се приклучи на швајцарската компанија за производство на пијалаци, Венинг извршувал раководни функции во „Монделез Интернешнл“ и „Унилевер“.

„Капри Сан“ не соопшти дополнителни детали за заминувањето на Венинг, ниту го објави неговиот наследник на позицијата извршен директор.

Во следниот период компанијата ќе ја водат постојните раководители и вработени, како и сопственикот Ханс-Петер Вилд. Вилд, кој ја развиваше компанијата во изминатите 50 години и сè уште ја извршува функцијата претседател на Управниот одбор, ќе има поддршка од Ролф Фалегер и другите членови на Управниот одбор.

Фалегер ја започнал својата долгогодишна кариера во „Проктер & Гембл“, по што значителен дел од професионалната кариера поминал во „Линдт & Шпрингли“, каде што бил член на Извршниот одбор на групацијата.