Компанијата „Херши“ (The Hershey Company) објави дека Аманда Алмонд е именувана за нова претседателка на меѓународното работење, наследувајќи го Рохит Гровер.
Алмонд има повеќе од 30 години искуство во секторот на стоки за широка потрошувачка и малопродажбата. Во „Херши“ доаѓа од компанијата „Винархи“, каде што ја извршувала функцијата регионална директорка за Европа, Блискиот Исток и Африка, по 12 години поминати на високи раководни позиции во компанијата „Бакарди“.
Во „Винархи“, глобална винска компанија поддржана од инвестицискиот фонд „Бејн Капитал“, Алмонд раководела со регион што опфаќа 57 пазари.
Во текот на своите 12 години во „Бакарди“, извршувала раководни функции со сè поголема одговорност, постојано остварувајќи деловни резултати.
„Аманда е докажан меѓународен лидер кој знае како да гради и развива брендови на пазарите ширум светот. Таа има богато искуство во развојот на работењето, обединувањето тимови и градењето организации со високи перформанси, а ги носи и искуството и енергијата потребни за забрзување на нашиот меѓународен раст“, изјави Кирк Танер, извршен директор на „Херши“.
Тој му се заблагодари и на досегашниот претседател на меѓународното работење, Рохит Гровер, за неговиот придонес во компанијата.
„Исто така, сакам да му се заблагодарам на Рохит за 27 години лидерство и посветеност на „Херши“. Тој помогна да изградиме меѓународно работење кое е подготвено за следната фаза на раст“, додаде Танер.
Аманда Алмонд, новата претседателка на меѓународното работење, истакна дека со задоволство ја презема новата функција.
„Брендовите на „Херши“ се омилени ширум светот и голема чест ми е што ѝ се приклучувам на компанијата во толку возбудлив момент за нејзиното меѓународно работење. Благодарна сум му на Рохит за силните темели што тој и неговиот тим ги изградија и се радувам на соработката со нашите вработени, купувачи и партнери за да ги доближиме овие култни брендови до уште поголем број потрошувачи“, изјави Алмонд.
