„Фуд Лајон“, американски малопродажен бренд на компанијата „Ахолд Делез“, објави дека постигнал договор со „Вин-Дикси Компани“ за купување пет продавници на „Вин-Дикси“ во јужниот дел на американската сојузна држава Џорџија.
Со оваа трансакција, „Фуд Лајон“ дополнително ќе ги зајакне своите капацитети за да им понуди на поголем број потрошувачи свежо овошје и зеленчук, квалитетно месо, готови јадења и секојдневни намирници по пристапни цени, се наведува во соопштението на компанијата.
„Со додавањето на овие продавници ќе можеме да обезбедиме квалитетна храна за уште поголем број семејства низ Џорџија. Тоа е суштината на она што го претставува „Фуд Лајон“. Растот што го остваруваме ни дава силен поттик во пресрет на 2027 година. Секоја нова продавница ја проширува нашата мрежа и дополнително го зајакнува нашето присуство во градовите и заедниците што ги опслужуваме, овозможувајќи им на вработените да им понудат на купувачите едноставно и пристапно искуство при пазарувањето, по кое „Фуд Лајон“ е препознатлив“, изјави Грег Финчам, претседател на брендот „Фуд Лајон“.
„Фуд Лајон“ претходно планираше да отвори десет нови продавници до крајот на 2026 година, но со оваа аквизиција ќе го надмине планот и ќе ја заврши годината со вкупно 15 нови продавници.
Компанијата очекува да вработи околу 375 нови работници во петте нови продажни објекти.
Продавниците ќе продолжат да работат под брендот „Вин-Дикси“ до завршувањето на трансакцијата и исполнувањето на сите вообичаени услови за купопродажбата. Потоа, „Фуд Лајон“ планира да ги преуреди и повторно да ги отвори кон средината на декември.
На купувачите ќе им бидат достапни нов распоред на продажниот простор, проширен асортиман, како и услуги за подигнување на нарачките и домашна достава преку платформата Food Lion To Go.
Трговскиот синџир, исто така, во секоја нова продавница ќе поддржува програми за борба против гладот и ќе соработува со банки за храна и локални организации, со цел семејствата на кои им е потребна помош да имаат пристап до квалитетни прехранбени производи.
Преку својата програма Food Lion Feeds, компанијата од 2014 година досега донирала повеќе од 1,5 милијарди оброци, а поставила цел до 2032 година вкупниот број донирани оброци да достигне три милијарди.
