„Интершпар Шотентор“: Супермаркетот како гастрономска дестинација

„Интершпар Шотентор“ е еден од водечките премиум супермаркети во Европа. Пет години по отворањето, овој водечки објект во Виена покажува како трговците со прехранбени производи можат да ја задржат привлечноста за купувачите преку гастрономска понуда, експертиза во сегментот на свежа храна, соработка со локални добавувачи и малопродажен концепт кој продавницата ја претвора во гастрономска дестинација.

„Интершпар Шотентор“ е еден од најпрепознатливите премиум концепти за прехранбена малопродажба во Европа. Пет години по отворањето, продавницата и понатаму успешно ја одржува својата премиум позиција благодарение на извонредната гастрономска понуда, стручноста во областа на свежата храна, соработката со локални добавувачи и исклучително широкиот асортиман, и покрај сè поинтензивната конкуренција во малопродажното опкружување.

Сместен во самиот центар на Виена, овој концепт истовремено одговара на различни потреби на купувачите. Вработените од околниот деловен дистрикт, студентите од блискиот Универзитет во Виена и туристите кои го посетуваат центарот на градот ја користат продавницата на различни начини. Таквата разновидна структура на купувачи му овозможува на Interspar под еден покрив да ги обедини премиум купувањето намирници, понудата на храна за непосредна консумација, гастрономската услуга и специјализираниот асортиман.

Продавницата е отворена во мај 2021 година во некогашното седиште на „Винер Банкерферајн“, репрезентативна зграда изградена во 1912 година. По тригодишна реконструкција и инвестиција поголема од 10 милиони евра, Interspar го трансформирал историскиот објект во прехранбена дестинација со површина од 1.770 квадратни метри и околу 25.000 артикли во понудата.

Најизразениот елемент на овој концепт е наменскиот простор Market Kitchen. Понудата на храна за носење и угостителските содржини имаат централна улога во продавницата и покажуваат како трговецот го приспособил овој објект на променетите очекувања на потрошувачите во однос на практичноста и готовите јадења. Понудата опфаќа свежо подготвени јадења, bowls оброци, супи, суши, како и австриски класици за носење, како што е Schnitzelsemmel. На купувачите им се достапни повеќе од 100 готови оброци, од кои многу се подготвуваат на лице место и се продаваат под посебен бренд на „Интершпар Шотентор“.

Составен дел од концептот Market Kitchen е пекарата со целосно производство во рамките на објектот, каде што лебот, сендвичите, колачите, грицките и фокачите рачно се подготвуваат пред очите на купувачите.

Покрај концептот Market Kitchen, Schottentor ја пренесува премиум филозофијата и во услужните оддели за свежа храна. Одделите за сирења и месо и понатаму претставуваат еден од клучните елементи на концептот. Понудата опфаќа речиси 450 видови сирења, dry-aged beef, специјални видови пршута, премиум парчиња месо, како и богат избор на свежа риба и морски плодови.

Регионалното снабдување претставува уште еден важен столб на овој концепт. Преку кампањите „Das Beste liegt so nah!“ („Најдоброто е толку блиску!“) и „Von dahoam das Beste!“ („Најдоброто од домашниот крај!“), “Интершпар Шотентор“ промовира речиси 600 производи од околу 150 австриски добавувачи. Локалните производители се претставени директно на полиците, со што регионалното потекло станува видлив дел од искуството при купувањето. Ваквиот пристап истовремено ја зајакнува автентичноста на понудата, придонесува за диференцијација во однос на конкуренцијата и дополнително го зацврстува премиум позиционирањето на продавницата.

Истата логика е применета и во одделот за вина, кој во понудата има околу 850 вина и пенливи вина од Австрија и други земји. Посебен простор е посветен на вината од Виена, што покажува како продавницата го проширува концептот на локално снабдување и во категоријата пијалаци.

Пет години по отворањето, „Интершпар Шотентор“ и понатаму изгледа беспрекорно, внимателно е одржуван и ја задржува својата пазарна релевантност. Овој концепт останува силен пример за тоа како премиум прехранбената малопродажба може да создава дополнителна вредност која ја надминува конкуренцијата со цена, потпирајќи се на експертиза во областа на храната, практичност и диференцирано искуство при купувањето. Истовремено, претставува гастрономски храм во срцето на Виена и своевиден излог на развојот на современата европска култура на храна.

Посета на продавницата

„Интершпар Шотентор“ е еден од водечките премиум концепти за прехранбена малопродажба во Европа, кој обединува богата понуда на свежа храна и развиен foodservice сегмент. Продавницата се наоѓа во некогашното седиште на „Винер Банкерферајн“, една од најзначајните австриски банки од почетокот на 20 век.

Историската банкарска сала сочувала голем дел од оригиналната архитектура од 1912 година, вклучувајќи ги мермерните ѕидови, високите тавани и декоративното осветлување. Цвеќето и егзотичното овошје создаваат премиум прв впечаток уште на влезот во продавницата.

Market Kitchen обединува пекара со целосно производство и повеќе концепти за свежо подготвени оброци под единствен бренд. Сегментот на храна за носење и foodservice зафаќа приближно една третина од продажниот простор.

Поголемиот дел од повеќе од 100 готови оброци носат посебен бренд „Интершпар Шотентор“, чиј визуелен идентитет ја користи историската зграда како симбол. Ознаката „Frisch im Markt zubereitet“ („Свежо подготвено во продавницата“) дополнително ја нагласува подготовката на лице место.

Во рамките на Market Kitchen се наоѓа пекарата под називот „Backstube“ (пекарска работилница). Свеж леб, сендвичи, колачи и грицки се подготвуваат и се изложуваат покрај соседните гастрономски концепти.

Широк избор на фокачи рачно се подготвува пред купувачите во продажниот простор. Со истакнувањето на фактот дека тестото отстојува 24 часа, дополнително се нагласува занаетчискиот карактер на пекарската понуда во споредба со производите допечени од замрзнато тесто.

Еден од пултовите на Market Kitchen е наменет за свежо подготвени оброци во чинии (bowls оброци). Концептот ги обединува можноста за персонализација, практичноста и оброците богати со протеини, во согласност со актуелните трендови во гастрономијата.

Купувачите можат да креираат оброк според сопствените желби, избирајќи основа, вид протеин, зеленчук, прелив и додатоци.

Пултот со топли јадења го промовира Schnitzelsemmel, еден од најпрепознатливите австриски концепти на храна за носење. Покрај традиционалните верзии со свинска, пилешка и мисиркина шницла, во понудата има и вегетаријанска варијанта.

Во централниот дел на продавницата продажниот простор се отвора во своевиден пазар со услужни оддели, специјализирани сегменти и сезонски изложби. Отворениот распоред ги води купувачите низ различни гастрономски целини под сочуваната архитектура на некогашната банкарска сала.

Додека многу трговци ги замениле услужните оддели за сирења со самопослужни витрини, „Интершпар“ продолжува да инвестира во стручен персонал и персонализирана услуга. Услужниот пулт е дел од асортиманот кој опфаќа речиси 450 видови сирења.

Постерот претставува Stilton збогатен со порто вино, додека непосредно зад него, во витрината, е видлив процесот на зреење на сирењата кој се одвива во самата продавница.

Пет години по отворањето, „Интершпар Шотентор“ и понатаму успешно го спојува премиум малопродажниот концепт со сочуваната архитектура на некогашната банкарска сала. Балон по повод петгодишнината дополнително ја нагласува трајната релевантност на овој концепт во центарот на Виена.

Одделот со трајни прехранбени производи ги промовира регионалните производи под слоганот „Das Beste liegt so nah!“ („Најдоброто е толку блиску!“). Кампањата во оваа продавница истакнува речиси 600 производи од околу 150 локални добавувачи.

Комуникацијата „Produkte aus der Nachbarschaft!“ („Производи од соседството“) ги претставува локалните добавувачи директно на полиците. Прикажаниот занаетчиски џин произведен во Виена покажува како регионалното потекло се претвора во приказна за производителот.

Посебниот оддел за вина нуди околу 850 вина и пенливи вина од Австрија и странство. Разновидните профили на купувачи во овој дел од продавницата ја одразуваат широката база на потрошувачи која ја привлекува локацијата во центарот на градот.

На вината од Виена им е посветен посебен сегмент. Платформата „Von dahoam das Beste!“ („Најдоброто од домашниот крај!“) го проширува концептот на локално снабдување и во категоријата пијалаци.

Во задниот дел на продавницата се наоѓа голем услужен пулт со месо, кој претставува еден од главните магнети за купувачите. Одлежаното говедско месо, специјалните видови пршута и премиум парчињата месо дополнително ја потврдуваат експертизата на продавницата во сегментот на свежата храна.

Зоната со каси комбинира традиционални наплатни ленти со значително поголем простор за самопослужно плаќање. Големите ѕидни графички елементи со мотиви од историската зграда дополнително го зајакнуваат идентитетот на продавницата и во завршната фаза од купувањето.

Како омаж на некогашната намена на зградата, просторот за пакување на купената стока вклучува оригинални банкарски сефови за чување вредности. Сочуваните елементи го поврзуваат искуството при купувањето со историјата на овој објект.

Како дополнителна услуга за купувачите, оние кои ќе остварат купување поголемо од 50 евра можат да ги остават количките на посебен пулт за достава. За надомест од 4,99 евра, Interspar организира достава на домашната адреса истиот ден.

Благодарение на локацијата во центарот на Виена, продавницата привлекува многу разновидна структура на купувачи. Блиската Заветна црква (Votivkirche), Универзитетот во Виена и деловниот центар на градот привлекуваат туристи, студенти и вработени.

Фото: Sebastian Rennack