„Елида“ отвори два нови маркети во Штип

Трговскиот синџир „Елида“ вчера (11 март) отвори два нови маркети во Штип, со што почна реализацијата на најавеното проширување во источниот регион на земјата.

Новите објекти се во населбата Леваци (бр. 36) и во населбата Пребег (бр. 37). Маркетите ќе работат според стандардниот концепт на „Елида“: 6-7 вработени, 2 наплатни каси, продажна површина од околу 200 квадратни метри, асортиман од околу 5.000 артикли, пиљара и пекарница со свежо печен асортиман. Двата маркета работат од понеделник до сабота, од 6:00 до 22:00 часот.

Отворањето е дел од планот на компанијата за отворање пет нови маркети во Штип и во Свети Николе, најдоцна до крајот на март. Уште два се предвидени во штипските населби 8 Ноември и Баби, додека еден маркет ќе биде лоциран на градскиот плоштад во Свети Николе.

Трговскиот синџир, кој почна во Куманово, денес работи преку 30 маркети во Куманово и пет во Скопје. Со новите локации, вклучувајќи ги и двата новоотворени, мрежата на „Елида“ ќе достигне вкупно 40 објекти.

Проширувањето во источниот регион се оценува како логичен чекор во понатамошниот развој на компанијата.