Mногумина сметаат дека најуспешните брендови на светот се издвојуваат само по препознатливите логоа и слогани, но, тоа всушност не е така. Сигурно си мислите: тогаш мора да е до производот – колку е подобар, толку брендот е поуспешен. Иако сите овие сегменти се важни, сепак, најважното нешто што ги поврзува сите најуспешни брендови во светот е раскажувањето приказни, или како што сега е веќе одомаќинет англицизмот - storytelling.
Како беше она, на почетокот беше зборот. Добрата приказна е најсилната алатка. А колку поавтентична приказна имате, толку поуспешно ќе изградите доверба, препознатливост и најважното - емоционална врска со клиентите.
Штом луѓето се препознаваат во вашата приказна, вие како бренд престанувате да бидете само производ и станувате нивен избор, навика и го стекнувате најважното - нивната доверба.
Кога еднаш ќе создадете чувство како бренд, тогаш почнува вашата вистинска моќ на брендирањето.
И можеби порано ова било многу полесно, конкуренцијата не била толку силна, а каналите за маркетинг биле поограничени. Денес, просечен потрошувач е изложен на илјадници маркетинг пораки секој ден. Едно отворање на „Инстаграм“, „Фејсбук“, „Јутјуб“ или „Тик-ток“, и „бомбардирањето“ почнува. Акции, попусти, новитети, промоции, нови бизниси што се натпреваруваат да го задржат вниманието на потенцијалниот клиент, а тоа во денешно време е претешко. На сите вниманието ни е намалено, ни се брза, немаме трпение да читаме долги текстови, ниту пак докрај да изгледаме кус рил од дваесетина секунди.
Во таков океан, за да победите како бренд, не треба да врескате, зашто за кусо време ќе се преморите и ќе согорите. Победник ќе биде оној што ќе остави впечаток.
Залудно е да кажувате колку вашиот бренд е најдобар, со најдобра цена, најуникатно лого, постојано да им кажувате кога и колкави попусти имате.
Луѓето се потпираат на чувства, и ако успеете да им ги разбудите, ќе ги придобиете.
Токму затоа storytelling покрај тоа што е креативен додаток на маркетингот, е и стратешка алатка за градење бренд. Добрата приказна ќе го претстави производот, но покрај тоа таа му дава и контекст, значење и причина зошто некој треба да го одбере токму вашиот бренд, а не нечиј друг.
Најуспешните компании одамна го знаат тоа. Тие не се прашуваат „што продаваме?“, туку „какво чувство сакаме да предизвикаме?“
За пример да земеме спортска опрема. Знаете од каков материјал се направени вашите патики? Можеби и знаете или ќе погодите, ама попрво ќе се сетите дека сте ги купиле за да трчате, да се подготвите за маратон, или за да планинарите. Ќе се сетите на мотивацијата, на чувството на задоволство и гордост што сте останале доследни на целта, на тоа дека сте одлучиле да станете подобра верзија од себеси.
Затоа најсилните брендови не комуницираат само околу брендот (патики направени од гума, кожа, со воздушни перничиња), туку околу чувството што нивниот производ ви го создава (мотивација, доследност, упорност).
За да не паднете во замката на многу компании што веруваат дека нивната приказна ќе освои ако пласираат година на основање, број на вработени и нивното искуство (што патем се важни информации, но целосно неважни за потенцијалниот клиент) размислувајте подлабоко.
Вистинската приказна почнува многу порано и со прашањето: зошто постоиме и каков проблем решаваме? Понатаму, како нашиот бренд му го подобрува денот на клиентот и што сакаме тој да почувствува кога ќе дојде во контакт со брендот?
Секој одговор го дефинира идентитетот на брендот, од лого, до бои, веб-страница, потоа реклами и слоганот. Сѐ ова потоа станува визуелен и комуникациски израз на таа идеја.
Важно е да се нагласи дека storytelling не значи измислување приказни. Иако звучи како да е лесно („ќе смислиме нешто“), всушност вашата работа е да бидете вистински и автентични во раскажувањето приказна. Најмоќните брендови ја покажуваат мисијата преку конкретни дела, преку нивните вредности и секојдневни одлуки, преку нивното ветување преку искуството што му го нудат на клиентот.
На крајот, луѓето се вљубуваат во идеи, вредности и чувства со кои се идентификуваат. Производот е второстепен - тоа е нешто што се користи секако, што олеснува и му помага на клиентот.
Затоа најуспешните брендови, силно се потпираат на storytelling, не зашто сакаат да се слушнати, туку зашто сакаат да бидат почувствувани. Кога еднаш ќе создадете чувство како бренд, тогаш почнува вашата вистинска моќ на брендирањето.
