Започна 12. FMCG Summit во Скопје: Во фокусот иднината на трговијата

Во хотелот „Александар Палас“ во Скопје денеска започна 12. издание на FMCG Summit, посветено на трговијата, производството и дистрибуцијата на стоки за широка потрошувачка. Настанот обединува претставници на компании и експерти од земјава и регионот, кои ќе разговараат за промените на пазарот, потрошувачките навики и примената на новите технологии.

Mеѓу главните теми се иднината на европската малопродажба, можностите за раст на македонскиот пазар и влијанието на вештачката интелигенција врз работењето на компаниите. Предвидени се и презентации за користењето податоци при анализата на продажбата, развојот на брендовите и подобрувањето на деловните резултати.

Говорници се Борис Планер, амбасадор на Светскиот конгрес за малопродажба, Реј Гол, извршен директор на „Ритеил ситис“, и професорот Андреј Визјак, основач и извршен директор на „АВ консалтинг“.

Во текот на самитот ќе бидат претставени анализи за регионалните трендови и потребите на потрошувачите, како и искуства за организацијата на продажните тимови, развојот на кадарот и создавањето нова вредност на производите.

Завршниот дел од програмата е посветен на панел-дискусија за понудата на полиците и исплатливоста на иновациите. Учесниците ќе дебатираат дали поголемиот број производи носи и поголема продажба, како и за конкуренцијата од приватните трговски марки.

FMCG Summit се одржува по дванаесетти пат, како простор за размена на искуства и воспоставување деловни соработки меѓу професионалците од секторот.