Компанијата „Мако маркет ДОО Скопје“ официјално го промени името во „Агна ДОО Скопје“, со што стана дел од регионалната „Агна груп“. Седиштето, матичниот и даночниот број остануваат непроменети. Компанијата продолжува со производство на кондиторски производи за домашниот и меѓународните пазари, како и дистрибуција на FMCG-производи за македонскиот пазар.
Разговараше: Данче Драгинова-Камчева, danche@instore.mk
По повод интеграцијата во „Агна груп“, разговаравме сo Кирил Макрески, управител на „Агна Скопје“, за стратешките планови, инвестициите, идното позиционирање на компанијата и можностите за извоз и развој на нови пазари.
Што конкретно ќе значи интеграцијата во „Агна груп“ за стратешкиот развој и идното позиционирање на компанијата на домашниот пазар?
„Агна груп“ е приватно акционерско друштво од Република Албанија, кое е лидер во категоријата дистрибуција и трговија на големо со производи за широка потрошувачка и пијалаци на пазарите во Албанија и во Косово. Групацијата има изградено партнерски односи со најголемите светски производители и принципали како „Нестле“, „Монделез“, „Пепсико“, „Карелиа“, „Мега диспосеблс“ и други.
Истовремено, групацијата произведува и безалкохолни и алкохолни пијалоци во Албанија, како под своите сопствени брендови, така и за познати странски брендови како Heineken, Pepsi, Lipton и други. Остварува одлични финансиски резултати и има изградено висока репутација, применувајќи највисоки стандарди во работењето и препознатлива услуга на пазарот.
Стратешкиот развој на „Агна Скопје“ се темели на два столба: производство на кондиторски производи за македонскиот и за интернационалните пазари и дистрибуција на повеќе FMCG-категории, наменети за домашниот пазар. Во сегментот производство на кондиторски производи и пуканки, се планираат инвестиции во нови линии за производство, проширување на асортиманот, фокус кон највисок квалитет и зголемување на извозот на нови пазари. Во сегментот дистрибуција на FMCG-производи на домашниот пазар, се предвидува продолжување на партнерската соработка со постојните принципали и проширување на дистрибуцијата со нови партнерства, користејќи ја големата мрежа на „Агна груп“.
Идното позиционирање и визија на компанијата „Агна Скопје“ е да стане една од најголемите производители на кондиторски производи и дистрибутери во државата и во регионот.
Дали се планирани инвестиции во проширување на производствените капацитети, логистиката или дистрибутивната мрежа по преземањето?
Како компанија, веќе 36 години активно работиме на македонскиот пазар, поминувајќи низ различни предизвици и вложувајќи постојано во развој и инвестиции.
Во сегментот производство, друштвото постојано инвестира во нови линии и модернизација на фабриката, за што имаме добиено IFS-стандард со највисоки оценки. Се завршуваат инвестициите во нова линија за вафер-ролери (Wafer rolls) и екстензии на пуканките Тазе, сегменти во кои сме лидери на пазарот.
Во сегментот дистрибуција, завршуваме инвестиција во креирање нова продажна и логистичка дивизија за смрзната програма, бидејќи станавме официјален дистрибутер за сладоледите на „Нестле“ за домашниот пазар преку принципалот „Фронери“.
Перспективно, друштвото планира изградба на нов најсовремен производствено-логистички центар во Кисела Вода, Скопје, во кој ќе бидат поставени и нови линии за производство и магацин. Подготовките и проектната документација се во финална фаза и се очекува почеток на градежните работи во текот на 2026 година.
Како членството во една регионална групација ќе влијае врз извозните активности и можноста за влез на нови пазари?
Присуството на „иста маса“ во големото семејство на „Агна груп“, пред сѐ, значи голема одговорност кон сите наши клиенти и деловни соработници. Токму тоа е елементарниот критериум за настап на новите пазари и потенцијалот што недвосмислено ќе биде ставен во функција на нашето деловно работење.
„Агна груп“ како производител на пијалаци и дистрибутер на светски брендови има силен нетворкинг со познати регионални и светски компании од сегментот продажба, како и од сегментот производители на суровини. Групацијата има и големо искуство, информации и директен контакт со крајните потрошувачи и производители, односно може да даде значителен придонес во развојот на производите.
Дали ќе има промени во организациската структура, тимот или во начинот на соработка со постојните партнери и доставувачи?
„Агна Скопје“ веќе има поставена организациска структура според стандардите на „Агна груп“. Работењето го води локален менаџерски тим, кој е исклучително стручен и обучен и претставува добар микс од искуство и младост.
Дополнително, друштвото има надзорен орган – Одбор на директори, во кој членуваат сопствениците и надворешни експерти, кои даваат поддршка во носењето стратешки одлуки и вршат надзор на работењето.
„Агна груп“ има препознатлива корпоративна филозофија „Agna Way“ и Академија за лидерство и развој на своите вработени, по кои е препознаена во регионот како посакуван работодавец и соработник.
„Агна Скопје“ е веќе усогласена со „Агна груп“ од аспект на идентитет, мисија, визија, корпоративна култура, филозофија, основните вредности на вработените и начинот на кој дејствуваме. Во понатамошниот период, ќе продолжиме со унапредување на процесите, софтверот и дигитализацијата, како и со развојот на вработените.
Нашата деловна политика е поставена на многу прецизни постулати од кои произлегуваат деловните одлуки, изборот на деловните партнери и доставувачи. Со тие принципи, кои се основа за квалитетот на нашата понуда, продолжуваме да работиме и понатаму.
Почнувајќи од 9 февруари годинава, „Агна Скопје“ продолжи со истите оперативни активности, односно компанијата работи оперативно во согласност со важечките договори, договорените комерцијални услови, цените и секако, со континуитет на квалитетот на услугите.
