ЕУ издаде препораки за иднината на винскиот сектор

Работната група за вино на Европската комисија издаде  препораки кои треба да обезбедат одржливост на винскиот сектор, а кои беа поддржани од сите земји-членки.

Истакната е  потребата од управување со потенцијалот за производство на вино за да се реши прекумерната понуда. Овие алатки, велат од работната група, вклучуваат насочени програми за расчистување лозови насади за одредени региони или вински сорти, привремена модулација на производниот потенцијал преку пофлексибилен систем за управување, односно одобренија за садење и повторно засадување винова лоза или механизми за олеснување на приспособувањето на приносите на грозје.

Групата, исто така, ја нагласува потребата да се зајакне отпорноста на лозарите на пазарните и климатските ризици преку поефективна борба против нефер трговските практики.

Кога станува збор за буџетот на заедничката земјоделска политика за винскиот сектор, се препорачуваат промени во националните програми за поддршка за да ги направат пофлексибилни и да овозможат побрз одговор на нарушувањата на пазарот или климатските промени.

Понатаму, се нагласува важноста од адаптирање на секторот на променливите преференци на потрошувачите и трендовите на глобалниот пазар, охрабрувајќи ги иновациите и развојот на производи како што се безалкохолизираните вина.

Се препорачува да се олесни директната продажба од производителите на потрошувачите и да се поттикне винскиот туризам, како и да се промовираат вината од ЕУ како симбол на одржливост, рурален развој и културно наследство.

Неопходно е да се зајакне отпорноста на нашиот вински сектор, како и да се прилагоди на новите пазарни трендови за да се обезбеди долгорочна одржливост. Преку овие мерки, кои вклучуваат зголемување на конкурентноста, одржливоста и издржливоста, ќе обезбедиме секторот да биде подобро подготвен за иднината и подобро да се справи со предизвиците што претстојат, нагласи Кристоф Хансен, комесар за земјоделство и храна.

Извор: Agroklub

Фото: Pexels