„Кока-Кола“ објави дека ја завршила глобалната ревизија на својот оперативен маркетиншки систем, осмислен да го поттикне растот, да ги зајакне врските со потрошувачите и да овозможи развој на нова генерација способности засновани на податоци, технологија и вештачка интелигенција.
Во рамките на новиот систем, „Кока-Кола“ ќе го задржи WPP Open X како свој глобален медиумски партнер, со исклучок на Северна Америка, Јапонија и Јужна Кореја.
Компанијата го избра „Омником“ за медиумски партнер во Северна Америка, при што агенцијата тесно ќе соработува со WPP StudioX, додека „Денцу“ ќе продолжи да управува со медиумските активности во Јапонија и Јужна Кореја.
„Го започнавме овој процес со јасна цел: да обезбедиме соодветни партнери, способности и оперативен модел за да продолжиме да бидеме лидери во маркетиншкото опкружување кое брзо се менува. Резултатот ја потврдува нашата доверба во силата на глобалниот маркетиншки екосистем и ни овозможува да го забрзаме растот преку подлабоко разбирање на потрошувачите, поголема флексибилност и одговорна примена на новите технологии“, изјави Маноло Аројо, извршен потпретседател и директор за маркетинг и комерцијални активности со купувачите во „Кока-Кола“.
Од основањето на платформата Open X во 2021 година, компанијата „ВПП“ има клучна улога во модернизацијата на маркетиншкиот пристап на „Кока-Кола“ во повеќе од 200 земји и територии.
„ВПП“ во текот на процесот на евалуација оствари исклучителни резултати, демонстрирајќи силни и современи способности во областите на медиумите, технологијата и податоците. Нивното решение за податоци Open Intelligence се надоврзува на докажаните резултати постигнати за време на нашите глобални активности по повод Светското првенство во фудбал во 2026 година“, изјави Аројо.
„ВПП“ ги задржува активностите поврзани со креаторите на содржини, медиумите и маркетингот.
Компанијата, исто така, понудила водечка експертиза во областа Systems of Influence, како и силни капацитети поврзани со креаторите на содржини и комерцијалните и малопродажните медиуми.
Овие способности се поддржани од единствениот екосистем WPP Open, кој ги интегрира податоците, технологијата и вештачката интелигенција на глобално ниво.
Изборот на „Омником“ во Северна Америка ја одразува посветеноста на „Кока-Кола“ кон усогласување на специјализираните способности со специфичностите на одделните пазари.
Со обединување на медиумите, податоците, CRM-системите, програмите за лојалност и креаторите на содржини во еден поврзан екосистем, оперативната единица за Северна Америка ќе може да го надмине традиционалниот пристап заснован на одделни комуникациски канали и да создаде поинтегрирано искуство за потрошувачите, се наведува во соопштението на компанијата.
„Нашата ревизија беше насочена кон обликување на иднината на нашата маркетиншка организација. Најдобрите маркетиншки системи настануваат кога ќе ги поврзете најдобрите маркетиншки таленти со вистинските партнерства. Уверени сме дека токму оваа комбинација на глобален обем, локална експертиза, иновации и соработка ни го овозможува тоа“, порача Аројо.
Новата структура ќе се воведува постепено, почнувајќи од 1 декември.
