Азискиот пазар на производи за широка потрошувачка (FMCG) забележа умерен годишен раст на вредноста на продажбата од 1,5% во дванаесетмесечниот период заклучно со вториот квартал од 2026 година (MAT Q2 2026), додека потрошувачите низ регионот продолжија да ги приспособуваат своите навики за купување поради економската неизвесност.
Според најновиот извештај Asia Pulse Q2 2026 на компанијата „Ворлдпанел бај Нумератор“ (Worldpanel by Numerator), растот и понатаму е нерамномерен меѓу категориите. Сегментот на храна продолжува да го поддржува пазарот, додека секторот на млечни производи останува под притисок.
Извештајот покажува дека азискиот FMCG-пазар сè повеќе го обликуваат промените во начинот, местото и зачестеноста на купувањето, наместо едноставното зголемување на потрошувачката.
Потрошувачите го приспособуваат бројот на купувања, потрошениот износ при секое купување, изборот на производи и малопродажните канали за подобро да управуваат со домашните буџети.
На регионално ниво, храната беше најуспешниот голем сектор, со раст од 2,9%. Следуваат личната нега со раст од 2% и производите за одржување на домаќинството со 1,5%.
Сегментот на пијалаци остана речиси непроменет, со пад од 0,1%, додека млечните производи забележаа намалување од 2,3%.
Индија се издвојува со раст од 13%
Во вакви услови, Индија значително се издвојува на азискиот FMCG-пазар, бидејќи вредноста на продажбата на производи за широка потрошувачка во урбаните средини пораснала за 13% во периодот MAT Q2 2026, во споредба со растот од 9% една година претходно.
Податоците на Worldpanel покажуваат дека урбаниот FMCG-пазар во Индија остварил најголем раст меѓу десетте пазари опфатени со истражувањето.
Сепак, структурата на овој раст укажува на значителна промена во однесувањето на потрошувачите.
Растот не бил поттикнат од почесто купување, туку првенствено од зголемување на потрошениот износ при секое купување. Просечната потрошувачка по купување пораснала за 11,5%, додека бројот на купувања се намалил за 1,8%.
Личната нега се покажала како еден од главните двигатели на растот на индискиот FMCG-пазар.
Овој сегмент забележал раст од 16,3% во периодот MAT Q2 2026, значително над вкупниот раст на FMCG-пазарот и речиси двојно повеќе во споредба со растот од 8,7% една година претходно.
Онлајн продажбата во Индија порасна за речиси 49%
Еден од најзначајните наоди во извештајот се однесува на забрзаниот развој на онлајн купувањето FMCG-производи во Индија.
Вредноста на онлајн продажбата пораснала за дури 48,9% на годишно ниво, додека пазарниот удел на овој канал се зголемил од 3% на 4%.
Бројот на домаќинства што купуваат онлајн пораснал за 32,1%, а бројот на онлајн купувања за 11,4%.
Истовремено, потрошениот износ по купување се зголемил за само 1,2%.
Worldpanel го толкува ова како показател дека дигиталното купување станува редовен канал за дополнување на домашните залихи, наместо да се користи претежно за големи и повремени купувања.
Ова претставува важна промена во дистрибуцијата на FMCG-производи во Индија, каде што онлајн каналот сè уште има релативно мал пазарен удел, но брзо расте и според бројот на корисници и според зачестеноста на користењето.
Традиционалните продавници и понатаму доминираат
И покрај забрзаниот раст на електронската трговија, традиционалната малопродажна структура во Индија останува доминантна.
Продавниците од типот Kirana/Paan-Beedi и понатаму генерираат најголем дел од прометот на FMCG-производи, иако нивниот пазарен удел е намален за 1,5 процентни поени, на околу 77%.
Супермаркетите моментално учествуваат со околу 10% во вкупната вредност на продажбата на FMCG-производи, додека онлајн каналот го зголемил својот удел на приближно 4%.
