„Акордиенс“ добива ново име и раководство

Меѓународната комуникациска групација „Акордиенс“ од 2 ноември работи под новото име „Грејлинг Груп“.

Новото раководство го предводи главната извршна директорка Сара Шолфилд, додека за раководење со работењето во Европа и на Блискиот Исток е именуван Џонатан Кертис.

Групацијата ја сочинуваат агенциите „Грејлинг“, „ЦДР“, „Ред Консалтанси“ и „Серкл“, кои работат преку 38 канцеларии ширум светот.

Компанијата вработува повеќе од 650 луѓе во Северна Америка, Обединетото Кралство, Европа, Блискиот Исток и Азија.

Агенциите во рамките на групацијата ќе ги задржат своите идентитети и специјализирани области на експертиза, додека тимовите и услугите ќе бидат потесно поврзани во согласност со потребите на клиентите.

Во новото раководство се и Тања Џозеф, извршна директорка за Обединетото Кралство, Џасмин Јап, извршна директорка за Азиско-пацифичкиот регион, како и Ести Пујадас, извршна директорка за Северна Америка.

Ним им се придружуваат и раководителите на одделните агенции и на клучните функционални области за поддршка.

Меѓу приоритетите на новата управа, како што истакнуваат од групацијата, се посилното поврзување на стратешкото советување, јавните работи и корпоративните комуникации, зајакнувањето на деловниот развој, инвестирањето во стручни кадри, како и развојот на капацитетите во областите на вештачката интелигенција, податоците и аналитиката.

„Новото раководство обединува силно локално лидерство со меѓународна експертиза, што ќе ни овозможи уште побрзо да одговараме на потребите на клиентите и подобро да ги искористиме знаењето и искуството што ги поседуваме во рамките на целата групација“, изјави Сара Шолфилд, главна извршна директорка на „Грејлинг Груп“.