Европската банка за обнова и развој (ЕБОР) инвестира до 40 милиони евра во инвестицискиот фонд CEECAT Fund III, кој ќе обезбедува капитал за раст на малите и средните претпријатија, како и на компаниите со средна големина во Централна и Источна Европа и Турција.
При првото затворање, фондот собрал 135 милиони евра, додека целта е да достигне вкупни обврски од инвеститорите во износ од 200 милиони евра, со максимален лимит од 250 милиони евра.
Меѓу клучните инвеститори кои го поддржале првото затворање на фондот се ЕБОР и Европскиот инвестициски фонд (ЕИФ), заедно со постојни и нови институционални инвеститори.
Инвестицијата има цел да придонесе за развој на пазарот на приватен капитал во регионите во кои работи ЕБОР и да им обезбеди на компаниите алтернативен извор на долгорочно финансирање во период кога условите за прибирање капитал и понатаму се предизвикувачки.
Преку мобилизирање институционален капитал и поддршка на локалните компании се очекува дополнително зајакнување на финансиските пазари и инвестициската активност.
CEECAT Fund III првенствено ќе инвестира во компании од Бугарија, Хрватска, Романија, Србија, Словенија и Турција.
Фокусот на фондот ќе биде на компании со силен потенцијал за раст, на кои капиталот ќе им помогне да го прошират работењето, да ја зголемат конкурентноста и да ги развијат своите меѓународни активности.
Со фондот управува компанијата „ЦЕЕКАТ Капитал“, долгогодишен партнер на ЕБОР, која од 2005 година инвестира во мали и средни претпријатија низ Централна и Источна Европа и Турција.
Новиот фонд ја продолжува стратегијата на претходниот CEECAT Fund II, со фокус на создавање дополнителна вредност, унапредување на оперативното работење и регионална експанзија на компаниите од портфолиото.
Покрај поддршката на растот на компаниите, CEECAT Fund III промовира високи стандарди на корпоративно управување и одговорно работење. Фондот планира да бара и можности за инвестиции во зелени проекти, применувајќи инклузивен пристап кој поттикнува поголема застапеност на жените и проширување на економските можности за различни општествени групи.
