Продажба на „Раденска“ во втората половина од годината

Продажбата на словенечката „Раденска" ќе биде завршена во втората половина од оваа година, изјави директорот на компанијата, Милан Хојник, за бизнис-дневникот „Финанце".

„Пивоварна Лашко", во чиишто рамки функционира и „Раденска", крена постапка за продажба на „Раденска" во септември минатата година, а во февруари е заклучен и продолжениот рок за собирање обврзувачки понуди.

Хојник рече дека заклучувањето на целата постапка, спротивно на најавите дека ќе биде порано, се очекува во втората половина на годината и дека идната организација на работата во компанијата ќе зависи од стратегијата на новиот сопственик и неговото вклучување на словенечкиот пазар.

Уверен сум дека за судбината на „Раденска", поради нејзината традиција, одличните трговски марки, афирмираните производи и знаењето на вработените, не треба да стравуваме, рече Хојник.

Обврзувачка понуда за купување на „Раденска" даде чешката компанија „Кофола", што со своите 700 вработени е втора најголема компанија за полнење и продажба на пијалаци, а според „Финанце", понуда дала и компанијата „Кока-Кола Хеленик".