Приходите на „Ледо“ паднаа за 1,9%, а расходите за 2,9%

Вкупните приходи на „Ледо" остварени во 2012 година изнесуваат 1,23 милијарди куни, а во споредба со минатата година намалени се за 1,9 отсто. 

„Ледо" од составот на „Агрокор" минатата година оствари добивка пред оданочување од 161,4 милиони куни, што е пораст од пет отсто во однос на годината претходно, е објавено во неревидираниот извештај од Загрепската берза. 

Основни карактеристики во 2012 година се порастот на добивката, падот на вкупните приходи со истовремен пораст на приходите од продажбата на домашниот пазар и падот на вкупните расходи, е наведено во извештајот.

Во „Ледо" велат дека падот на вкупните приходи и расходи во најголем дел е предизвикан од промената на продажната политика. Во претходните години, набавката на стока од странство се одвивала од централниот „Ледо", а во 2012 година, набавката самостојно ја извршуваат компаниите на „Ледо". На тој начин забележан е пад на приходите и извозот поврзан со претпријатијата во странство.