Поставен камен-темелник на дистрибутивниот центар „Делта“

Камен-темелникот на дистрибутивниот центар „Делта" поставен е во индустриската зона во општината Стара Пазова. Новиот центар е инвестиција на компанијата „Делта риал естејт" со вкупна вредност од 10,2 милиони евра.

Се планира завршување на изградбата во јануари 2015 година, кога центарот ќе стане дел од транспортниот систем „Делта" (ДТС), компанија во состав на „Делта Холдинг", која се занимава со логистичко-транспортни услуги, рече Дејан Јеремиќ, извршен потпретседател за оперативни работи во „Делта Холдинг".

Центарот се наоѓа на земјиште со површина од 10 хектари. Во првата фаза површината ќе изнесува 20.370 квадратни метри, со можност во втората фаза да се изградат уште 14.500 квадратни метри простор за складирање.

„Делта" продолжува да инвестира: минатата година нашиот хотел Crowne Plaza беше најголемата инвестиција во Србија; на почетокот од годината почнавме со изградба на ладилник на земјиштето Подунавље во Челарево, а денес овде ја почнуваме и изградбата на најмодерниот дистрибутивно-логистички центар, изјави Јеремиќ и додаде дека новиот центар, кога ќе биде во својот полн капацитет, на Србија ќе и донесе 400 нови работни места.

Според зборовите на Јеремиќ, центарот што е сместен на локацијата која ги поврзува клучните патни правци, ќе има 26.000 палетни места со различни температурни системи (-20 до + 25 °C). Благодарејќи и на можноста дневно да прифати и дистрибуира повеќе од 3.000 палети стока, секој ден ќе услужи 15.000 купувачи низ цела Србија. 

Камен-темелникот го поставија Мироаслав Мишковиќ, претседател на „Делта Холдинг" и Џорџе Радиновиќ, претседател на општината Стара Пазова.