Во првиот квартал од 2015 година, „Атлантик група" оствари приходи од продажба во вредност од 154,4 милиони евра, што во споредба со првиот квартал од 2014 година, претставува пораст од 3%.
Добивката пред оданочување изнесуваше 9,6 милиони евра, што претставува намалување за 14,2%, додека нето-добивката по исплатата на малцинските акционери изнесуваше 5,8 милиони евра, односно забележа пораст од 39,3%.
И покрај пазарните предизвици во регионот и пошироко, „Атлантик група" во првиот квартал годинава бележи пораст на приходите од продажба и подобрување на профитабилноста. Во средина на март беше пуштен во употреба производниот погон за енергетски барови во Нова Градишка, што претставува најголем инвестициски циклус за развој на производството, а успешно почна и процесот за интеграција на компанијата „Фудленд", која со брендот Bakina Tajnaќе го зголеми асортиманот на производи.Во текот на годината, фокусот ќе биде на понатамошниот пораст и интернационалното работење, управување со оперативните и финансиските ризици, оптимизација на работењето, одржување на ликвидноста и управување со финансиските обврски, истакна Емил Тедески, претседател на Управата на „Атлантик група".
Со отворање на современиот погон за енергетски барови, инвестиција вредна 13 милиони евра, продолжува консолидацијата на производните капацитети на групацијата, а производството на енергетски барови беше успешно префрлено од надворешните договорни произведувачи во сопствениот погон. Дополнително, на почетокот од оваа година, Српската комисија за заштита на конкуренција го одобри преземањето на компанијата „Фудленд", со што беа исполнети условите за интеграција на компанијата во состав на „Атлантик група".
За вкупниот пораст на приходите од продажба во првиот квартал годинава најмногу придонесоа секторите слатко и солено со пораст од 5,9%, деликатесни намази со 9,8%, кафе со 3,1%, како и стратешките дистрибутивни областиХрватска со пораст од 15,2%, Србијасо 5%, Словенија со 6%. Кафето со процентен удел од 18,8 во вкупните приходи на продажба, се истакнува како најголема поединечна категорија со 28,7 милиони евра.
Анализирано по пазари, најголем пораст од 11,7% беше остварен на пазарот во Хрватска, што изнесува 25,8% од вкупните приходи од продажба. Српскиот пазар со 22,6% има најголем удел во вкупните приходи од продажба и оствари пораст од 6,3%.
Сопствените брендови на „Атлантик група" во продажбата учествуваа со 63,1%, дистрибуцијата на брендовите од принципалите со 20,1%, фармацевтскиот синџир „Фармација" со 7,2%, додека производите што групацијата ги произведува како приватни трговски марки за големите трговци во земјата и во странство, учествуваа со 9,5% во вкупната продажба.
