„Подравка“ презема 51,55 отсто од акциите на „Жито“-Љубљана

„Подравка" склучи договор со конзорциумот на продавачи за стекнување на акции на „Жито", еден од најголемите и најпознатите прехранбени производители во Словенија кој има голема препознатливост на пазарите во Југоисточна Европа.

Конзорциумот го сочинуваат: „Словенечкиот државен холдинг", „Модра заваровалница", „КД Капитал", „КД Склади", „Адријатик Словенија" и „НЛБ Склади".

Врз основа на склучениот договор, „Подравка" ќе стекне 51,55 отсто од акциите на „Жито", но по добивањето одобрение од Агенцијата за заштита на конкуренцијата и по исполнувањето на условите од договорот. Цената на една акција изнесува 180 евра, а целиот износ достигна 33,02 милиони евра.

Со оваа аквизација „Подравка" ќе ја консолидира својата положба и ќе стане еден од лидерите на неколку дополнителни категории на производи, со што значително ќе се подобри нејзината позиција на пазарот.

Во „Подравка" очекуваат дека по завршувањето на оваа трансакција таа ќе го заземе челното место во прехранбената индустрија на пазарот во Словенија со што вкупниот приход на годишно ниво ќе достигне околу 118 милиони евра. Вкупниот консолидиран годишен приход на групацијата „Подравка" по преземањето на „Жито" ќе изнесува околу 594 милиони евра.

Со аквизицијата на „Жито" создаваме нов прехранбен лидер на пазарот во Словенија со значителен пораст на бројните пазари каде што „Подравка" е присутна. Ова претставува силен чекор кон интернационализација на работењето, при што пазарот во Словенија станува еден од најзначајните пазари за „Подравка". „Жито" е компанија со многу квалитетни производи, препознатливи брендови, со уреден систем на работење и со способни вработени кои сето тоа со години го создавале. Целта ни е оваа компанија да ја направиме поуспешна и подобра и да ги искористиме сите сите стратешки ефекти што ги препознавме при спојувањето, изјави при потпишувањето на договорот Звонимир Мршиќ, претседател на Управата на „Подравка".

„Подравка" и „Жито" имаат комплементарен асортиман на производи – станува збор за прехранбени производи кои имаат сличен модел на производство, продажба, промоција, дистрибуција и логистика. Во своето портфолио „Жито" има широка палета на препознатливи производи како што се Žito (брашно и пекарски производи), Zlato polje (ориз, тестенини и мелничарски производи), Maestro (зачини), 1001 Cvet (чаеви), Natura (житарици), Gorenjka (чоколадо), Šumi (бонбони).

Во компанијата сметаат дека со проширувањето на работењето во комплементарните групи на производи се создава можност на маркетинг-синергија на производството и на продажбата, со што се подобрува работењето на двете компании и се зголемува нивната конкурентност. На овој начин се овозможува продажба на производите на „Жито" преку продажно-дистрибутивната мрежа на „Подравка" во повеќе од 20 земји во светот.