„Подравка“ најави голем инвестициски циклус

Компанијата „Подравка" се подготвува за докапитализација со која има намера да обезбеди 224 милиони евра, со издвојување на 1,7 милиони нови акции.

Обезбедените пари се наменети за купување на словенечката компанија „Жито", за што „Подравка" веќе подигна кредит во износ од 58 милиони евра, а ќе го враќа сè додека не ја доврши докапитализацијата. Договорот за купување на „Жито" е потпишан кон крајот на април.

Помала, но интересна е инвестицијата во изградба на фабрика во Танзанија, најавена на почетокот на оваа година. 

Изградбата на фабриката во Танзанија претставува инвестиција кој почна во 2015 година, а завршувањето се очекува на крајот од оваа година или почеток на 2016 година. Инвестицијата се однесува на изградба на градежен објект и купување на технолошка и друг вид опрема, со што ќе се прошират производствените капацитети и ќе се овозможи пласман на производите на нови пазари во земјите од Африка. Вложувањето изнесува околу 3,4 милиони евра, дел од нив ќе бидат обезбедени од сопствени средства, а дел од кредит, истакнуваат од компанијата.