„Персу“ ги повика локалните производители да соработуваат

Трговскиот синџир маркети „Персу" го почна проектот „Наши сме" и ги повика локалните производители да соработуваат.

Трговскиот синџир сака дополнително да го зајакне, мотивира и да го поттикне локалниот развој, поддржувајќи ги локалните производители, а воедно нудејќи им на своите купувачи свежи и здрави производи, во повеќе од 140 малопродажни објекти во Војводина. 

Нашата цел е создавање благосостојба на локалната средина во која работиме, преку сопствена современа малопродажба и достапност на здрави, домашни и локални производи. Сакаме на нашите купувачи да овозможиме лесна достапност на ваквите производи, а на производителите, на нашите идни партнери, да им го олесниме пласманот и условите за работење, изјави Дарко Бјелоглав, директор и косопственик на маркетите „Персу". 

По повод официјалното претставување на проектот, беше потпишан и првиот договор со семејна млекарница од Мокрина.

Овој проект навистина може да ги охрабри производителите, бидејќи нуди можност за пласман на производите во 140 објекти на синџирот „Персу", а потенцијално и во 600 малопродажни објекти во Србија, во рамките на асоцијацијата „Домаќи трговачки ланац", чиј основач и член е „Персу". Веруваме дека тоа ќе го унапреди нашето работење, објасни Бојка Плавшиќ, сопственик на млекарницата „Морин-млек".