Пад на извозот на пиво за 40 отсто

Во првите пет месеци годинава, извозот на пиво од БИХ се намали за 130,4 илјади евра во однос на истиот период од минатата година, што претставува пад од 40 отсто.

На седницата на одборот на Групацијата на производители на пиво во БИХ во Комората за надворешна трговија на земјата, беше констатирано дека тоа е катастрофален податок. За овие индикатори придонесе значителниот пад на извозот на пиво во шишиња, особено извозот на пиво во амбалажи до 10 литри, кој се намали за 55 отсто.

Извозните вредности се речиси занемарливи во однос на увозните, а во БИХ во последните четири години се забележува тренд на константно зголемување на увозот. Овој факт укажува на неопходноста да се промени односот увоз – извоз, беше заклучено на седницата.

На седницата беше донесена одлука да се упати иницијатива до надлежните државни институции за организација на заеднички состанок, на кој ќе се разговара за можните решенија на клучните проблеми со кои се среќава босанскохерцеговската пивска индустрија.

Од комората соопштија дека на седницата Николас Пени, директор на „Бањалучка пивара", го презеде мандатот за претседател на управниот одбор на Групацијата.