Отворен нов погон на фабриката „Виолета“

„Виолета" - Груде, една од регионалните лидери во производство на хигиенски производи, кон крајот на јуни ја отвори новата фабрика на течни детергенти и детски пелени Violeta.

Ова е важен момент во развојот на нашата компанија и на нашиот бренд. „Виолета" станува рамноправна конкуренција на големите интернационални брендови во оваа категорија. Вкупната инвестиција од околу 20,5 милиони евра ќе обезбеди многубројни директни и индиректни работни места преку дистрибутивни, продажни, маркетиншки и други активности. Се надеваме дека ќе ги поттикнеме и другите домашни компании да вложуваат во производство што претставува клуч за развој на државата, а за „Виолета" ова е успех во долгогодишниот континуиран развој, истакна Петар Ќорлука, претседател на „Виолета".

Тој нагласи, дека освен еколошкото производство кое подразбира сопствен извор на вода, соларно енергетско напојување и потполна ефикасност без отпадни води, фабриката ги задоволува највисоките стандарди за автоматизација и енергетска ефикасност.

Со брзина од 6.000 литри на еден час, фабриката за течни детергенти ќе произведува детергенти за алишта и рачно миење садови, како и омекнувачи за алишта и други средства за лична хигиена. 

Како што е изјавено на отворањето, за прв пат во Европа, во рамките на фабриката за производство на пелени ќе се користи најсовремената јапонска технологија со брзина од 800 пелени во една минута и автоматска машина за пакување која за прв пат ќе биде лансирана во БиХ.

Наскоро се очекува пласирање и на нови производи од категоријата лична хигиена.