Објавена продажбата на фабриката „Банини“ во Кикинда

Фабриката за кондиторски производи „Банини" бара купувач. Стечајниот управник ја огласи продажбата на „Банини", како правно лице, а заинтересираните на 21 март ќе наддаваат во Кикинда.

Најважниот имот на „Банини" се индустриските комплекси 1 и 2, со производствени погони, деловните простории, станот во Кикинда, земјоделското земјиште и моторните возила.

Опремата што се наоѓа во индустрискиот комплекс Банини 1 е поделена во три линии: солена програма, стапчиња и вафли. Во индустрискиот комплекс Банини 2 опремата е поделена во пет линии: тврди кекси и кекси од путер, сендвич-кекси (брендовите Nobliceи Toto), чајно печиво (брендовите Domaćica и Grete), индустриски колачи и производство на кекси со чоколадо.

Почетната цена е 1.859.888.947 динари (околу 15 милиони евра), а депозитот за купување на стечајниот должник е 743.955.579 динари (околу 6 милиони евра).

Депозитот за учество во јавното наддавање може да се уплати најдоцна до 16 март, а наддавањето ќе биде организирано на 21 март во 10 часот во Кикинда.

Медиумите пишуваа дека за купувањето е заинтересирана „Јафа" од Црвенка.

Да потсетиме, Стопанскиот суд во Зрењанин одлучи фабриката да се продаде, затоа што на барање на банката „Сосиет женерал" е во стечај од април минатата година. Оваа банка бараше да се почне стечај за да ги наплати своите побарувања од околу 15 милиони евра, бидејќи поинаку не можеше да си ги врати позајмените пари.

Проблемите на оваа фабрика почнаа во 2010 година, кога „Банини" се задолжи кај банката за изградба на нов погон на Теремијскиот пат. Набрзо почнаа да стигнуваат високите рати од кредитор што константно се зголемуваа, па фабриката сè повеќе запаѓаше во долговите што и ја доведоа до стечај.

Сметката на фабриката од крајот на минатата година е блокирана за износ од 258 милиони динари (околу 2 милиони евра), а сопствениците и раководителите Радојко Станиќ и Бранко Маленчиќ, истовремено се осомничени за злоупотреба на своите позиции, затоа што ја оштетиле и фирмата и државниот буџет.