Ново раководство на „Метро кеш & кери“

Регионалните компании на меѓународниот трговски синџир „Метро кеш & кери" во Хрватска и во Србија од 1 јули добија ново раководство.

Холанѓанката Кристина Јохансон доаѓа на позицијата нов генерален директор на „Метро кеш & кери" – Србија, откако нејзиниот претходник, Роберто Манкусо, беше избран за претседател на управниот одбор на „Метро кеш & кери" во Хрватска.

Јохансон има долгогодишно искуство во областа на стратешкиот развој на глобални компании, а во тимот на „Метро" е од октомври 2016, каде што дојде со долгогодишно искуство стекнато на раководни позиции во компанијата „ИКЕА".

Роберто Манкусо кариерата во „Метро кеш & кери" ја почнал во 2001 година во Италија, а пред доаѓањето во Хрватска работел на пет различни раководни позиции во компанијата во пет земји Неговиот предизвик во Хрватска ќе биде да го раководи тимот што ќе ја трансформира „Метро кеш & кери" – Хрватска во партнер од прв избор за професионални купувачи, со фокус на хорека-секторот и независните трговци.

Во текот на изминатите две години, „Метро кеш & кери" – Хрватска успеа да оствари двоцифрен пораст во соработката со хорека-секторот, фокусирајќи се на B2B соработка, преку шест дистрибутивни центри.