Нов ИнфоЛогистички центар во Љубљана

„Карго-партнер" ќе почне со изградба на модерен ИнфоЛогистички центар во близина на аеродромот во Љубљана.

Меѓународната транспортна и логистичка компанија „Карго-партнер" ќе почне со изградба на логистички центар, проект кој е дел од стратешката инвестиција на компанијата за ширење на капацитетите за складирање. Новиот ИнфоЛогистички центар ќе се простира на 25.000 м² и ќе содржи повеќе од 20.000 палатни места.

Објектот ќе биде сместен во близина на аеродромот во Љубљана. Со 44 рампи за камиони, објектот ќе биде добро опремен за дневни преземања и дистрибуција на производи од и до околните места, истакна директорот на „Карго-партнер" во Словенија, Виктор Кастелиќ и додаде дека: Нашиот нов ИнфоЛогистички центар е одраз на зголемената побарувачка и на нашата посветеност на словенечкиот пазар. Задоволни сме и со тоа што го проширивме тимот на вработени од 100 на 130 луѓе.

„Карго-партнер" неодамна отвори ИнфоЛогистички центар од дрво во седиштето на компанијата во Фишаменд, Австрија, со вкупна површина од 12.200 м², како и ИнфоЛогистички центар во Софија, на површина од 16.500 м². Двата центра почнаа со работа оваа пролет.