Нето-добивката на „Краш“ во 2016 повисока за 73 отсто

Групацијата „Краш" во 2016 остварила нето добивка од 3,4 милиони евра, што е за 1,5 милиони евра или 73 отсто повеќе во однос на претходната година, се наведува во финансискиот извештај на компанијата објавен во понеделникот.

Во исто време, групацијата остварила вкупни консолидирани приходи во износ од 137 милиони евра, што значи пад од 0,4 отсто.

Како приходи од продажба, се наведува, остварен е износ од 135 милиони евра, при што 72,6 милиони евра биле остварени од продажба на хрватскиот пазар, а од продажба во странство, реализирале приходи во износ од 63 милиони евра со пораст од 4,6 отсто.

Како што истакнуваат од „Краш", обемот на извоз во минатата година пораснал за 3,6 отсто, што е во согласност со поставените цели за континуиран пораст на извозот на оваа кондиторска компанија. Од компанијата истакнуваат дека уделот на извозот во вкупната продажба достигнал 48,7 отсто.

Зголемената продажбата била остварена на прекуокеанските пазари, со акцент на извозот во Саудиска Арабија, САД и Канада и на европските пазари – во Австрија, на Малта, во Германија, Шведска, Словачка и во Швајцарија. Пораст на извозот бил остварен и преку поврзаните компании, на пазарите во Босна и Херцеговина, Словенија и во Македонија.

За позитивните трендови во продажбата значително придонесоа новите и иновативни производи, се наведува во извештајот. Притоа, се нагласуваат особено добрите резултати на кобрендирањето на силните брендови на „Краш", пред сè на чоколадата Dorina и кексите Domaćica, детскиот бренд KI-KI, како и на чоколадните наполитанки.

На постигнатите резултати во 2016 година значително влијаеле реализираните инвестициски активности во модернизација на производството во фабриките, во Загреб, и во поврзаните компании „Каролинa" во Осиек и „Мирa" во Приједор, се наведува во извештајот.