На полиците на „Метро“ само со сертификат GFSI

„Метро кеш & кери" – Хрватска иницираше постапка за сертификација на сите доставувачи и производители на прехранбени производи што ги произведуваат трговските марки (Aro, Fine Food, Horeca Select, Rioba) за овој трговски синџир.

Со влезот на Хрватска во ЕУ, овие хрватски производители ќе мораат да поседуваат меѓународен сертификат за квалитет признат од GFSI и трговецот, како што се наведува, ќе работи само со производители и доставувачи на прехранбени производи кои поседуваат еден од девет GFSI признати стандарди, како што е, на пример, Меѓународниот стандард за храна.

Од трговскиот синџир е соопштено дека тоа е важен чекор што овозможува постигнување на поголема конкурентност и полесен пристап на европските и светските пазари и можност за продажба на производи во рамките на групацијата „Метро", што работи во 32 држави во Европа, Азија и Африка, како и во други трговски синџири во Европа и светот.

Од компанијата истакнуваат дека од вкупно 50 производители, кои за „Метро" моментално ја произведуваат нивната трговска марка, веќе 15 од нив имаат воведен стандард што им овозможува непречен извоз на стока на европските пазари. За да им помогне на производителите на хрватските трговски марки во воведувањето на Меѓународниот стандард за храна и да им го олесни добивањето на сертификатот, „Метро", заедно со сертифицираната установа „ТУВ Хрватска", организираше дводневни работилници.