„Меркатор“ со добивка од 20 милиони евра

Групацијата „Меркатор" ја заврши 2015 година со позитивен деловен биланс во износ од 61,5 милиони евра. Нето-добивката во тој период изнесуваше 20,2 милиони евра.

Стратегијата од 2012 година, која е базирана на оптимизација, пораст, фокус и профитабилност, минатата година донесе позитивни деловни резултати, истакнуваат од компанијата.

Во 2015 година, „Меркатор" оствари нето-приходи од продажба во висина од 2,6 милијарди евра, што е за 1,6 отсто помалку во споредба со 2014 година. Како што беше кажано при претставувањето на резултатите, индикаторите не се целосно споредливи со оние од 2014 година, поради промената на структурата на продажбата. Промената е резултат на консолидацијата на трговската активност по пазари – во Србија поради преносот на малопродажните единици на компанијата „Идеа" на „Меркатор – С", а во Хрватска и во БИХ, поради преносот на малопродажните единици на „Маркатор" на „Конзум".

Во согласност со концентрацијата на основната дејност, групацијата лани ја продаде „Пекарна Гросупље" на компанијата „Дон дон", брендовите кафе Santana и Loka на компанијата „Иверо трејд", а туристичката дејност на „М холидејс" на „Компас". Од друга страна, групацијата ја зајакна големопродажбата со преземањето на дел од „Ера гуд".

За обнова и за модернизација на малопродажната мрежа, трговецот минатата година инвестираше 77,4 милиони евра и отвори 65 нови продажни центри, како и два дистрибутивни. Повеќе од половината од минатогодишните инвестиции на „Меркатор", поточно 54 отсто, се однесуваа на словенечкиот пазар.

Постигнатиот позитивен тренд на работење е поттик за понатамошниот фокус на групацијата на основната дејност, како што е на пример големопродажбата. Во иднина, ќе се обидеме уште повеќе да се грижиме за купувачите и да го зацврстиме „Меркатор" како симбол за „вистински најдобар сосед", рече Тони Блажич, претседател на управниот одбор.