Матијевиќ и Костиќ се откажаа од ПКБ

Сопственикот на индустријата за месо „Матијевиќ", Петар Матијевиќ, потврди дека тој и сопственикот на „МК груп", Миодраг Костиќ, се откажуваат од купувањето на ПКБ.

                      

Причината за откажувањето е затоа што тој и Костиќ сметаат дека не се доволно силни и дека не можат да се натпреваруваат со странските компании заинтересирани за „Пољопривредната корпорација Београда" – ПКБ.

За ПКБ интерес пројавиле компании од Обединети Арапски Емирати - „Ал дахра" и од Кина - „Хен Чанг груп", светски гиганти чии промет може да се измери со милијарди долари.

Не е реално да победиме во трка со толку големи системи, но ако се откажат овие две компании, Костиќ и јас би сакале да го преземеме ПКБ, објасни Матијевиќ, додавајќи дека оваа српска компанија е единствената што е во непосредна близина на Белград и една од ретките што преостана во Србија и што навистина вреди.

Компаниите „МК груп" и „Матијевиќ" во април 2015 година соопштија дека имаат намера да го здружат капиталот, знаењата и искуствата па формирајќи конзорциум, беа заинтересирани за купување на ПКБ. 

Агенцијата за приватизација на Србија, на 31 декември објави јавен повик за продажба на имотот на ПКБ, а почетната цена беше 51 отсто од постојаниот имот во вредност од 154 милиони евра.

Според претходно објавените податоци, ПКБ е сопственик на 1.400 хектари градежно земјиште и 5.200 хектари земјоделско земјиште. Во зависност од подружниците, во ПКБ се вработени околу 2.000 луѓе.