„Максима“ ги презеде маркетите „Пени“ од „Реве“

„Максима" – Бугарија, подружницата на литванската „Максима група", соопшти дека ги презеде 12-те објекти „Пени", кои функционираа во рамките на германската групација „Реве".

Во следните неколку месеци, објектите ќе станат дел од синџирот „Т маркет", со што вкупниот број на продавници со кои „Максима" функционира на бугарскиот пазар ќе достигне 60. Вредноста на аквизицијата и реконструкцијата се проценува на 7,6 милиони евра, а новите ребрендирани објекти ќе овозможат нови 200 работни места.

Малопродажниот пазар во Бугарија е многу конкурентен. Сведоци сме дека дури и некои од меѓународните синџири се борат за опстанок или се повлекуваат, а истовремено, популарноста на „Т маркет" се зголемува, изјави Алвидас Шустикас, извршен директор на „Максима група".

Минатата година, „Максима" – Бугарија прослави десет години од работењето во земјата и забележа пораст на приходите за 10,4 отсто, на 72,4 милиони евра.