„Лидл“ станува урбан

„Лидл" ги откри плановите за влез во централните зони на грчките градови.

Објавата на дисконтерот, кој е во сопственост на групацијата „Шварц", следува по отворањето на првиот објект од тој тип во центарот на Атина, пренесува грчкиот магазин „Селф сервис". Продавницата се простира на 1.348 квадратни метри, на две нивоа, што според написите на магазинот, е единствената двокатна локација на „Лидл" во Европа. Покрај објектот има и паркиралиште со 84 места.

Урбаните продавници нема да бидат многу помали од конвенционалните објекти, односно ќе се простираат на површина од 900 до 1.000 квадратни метри и ќе располагаат со паркинг-места. Во понудата ќе биде вклучен асортиман од околу 1.700 артикли.

За 2018 година, германскиот трговец планира инвестиции во износ од 85 до 100 милиони евра за грчкиот пазар. Се смета дека таа сума ќе биде искористена за нови отворања и за реновирање на постојните објекти, како и за вложување во дистрибутивната мрежа. За годинава се очекува изградба на ново складиште, а во план е и проширување на грчкото и на кипарското складиште, пренесуваат грчките медиуми.

Извор и фото: „ЛЗ ретеилитикс", www.retailytics.com