„Лидл“ ќе продава производи направени според стари семејни рецепти

По нарачка на „Лидл" – Бугарија, ќе се произведуваат производи направени по уникатен начин, според старите семејни рецепти.

Тоа е дел од кампањата „Зачувај го родниот вкус" што ќе трае од 25 септември до 22 октомври. Кампањата ја најави Милена Драгиска, извршен директор на „Лидл" – Бугарија, која нагласи дека тоа е продолжение на долгорочната политика на„Лидл" за поддршка на бугарските производи, производители и на традиционалниот вкус.

По регистрирањето на веб-страницата на „Лидл", учесниците во кампањата ќе може да споделуваат рецепти за бугарски традиционални конзервирани производи (туршија, слатко, компот и др.) или за сушени месни деликатеси (луканка, пастрма и др.), задолжително проследени со приказна за семејната историја и спомените поврзани со таа храна.

Професионалните готвачи Иван Манчев и Тањо Шишков ќе патуваат до местата и до луѓето што ги испратиле рецептите и ќе имаат можност да ги пробаат предлозите. Победникот ќе добие награда од 10.000 лева (околу 5.110 евра), а производот според неговиот рецепт, ќе биде изработен од домашен производител до крајот на годинава и ќе се продава во продавниците на синџирот во земјата.