„Конзум“ ќе инвестира 15 милиони евра

До крајот на годинава „Конзум" ќе отвори нови 300 работни места и ќе инвестира околу 15 милиони евра, најавено е во Сараево, на свеченоста по повод десетгодишното работење на компанијата на овој пазар.

Инвестициите ќе ги насочиме кон отворање 20 нови и адаптација на 30 постоечки објекти и модернизација и ширење на логистиката на територијата на БиХ, изјави Аднан Штета, извршен директор на „Конзум".

Директорот на „Конзум" Давид Долинар со задоволство најави дека е завршено преземањето на 89 продавници на „Меркатор" и негови 1.710 вработени. Меѓудругото најави и многу поволности за купувачите, ширење и зајакнување на соработката со домашните производители и доставувачи.

Овој трговски синџир најави дека во БиХ, во текот на 2015 година, ќе пласира 16.000 тони овошје и зеленчук, повеќе од 20.000 тони пилешко месо, повеќе од 130 тони риба, 11,2 милиони литри млеко, 10 милиони парчиња печиво и 25 милиони јајца. Сите овие производи се од домашно производство што е можно да се реализира благодарение на фактот дека „Конзум" во БиХ соработува со 700 доставувачи, а меѓу нив се 400 производители.