„Клас“ развива синџир на продавници со 100 објекти

Компанијата „Клас", најголемиот производител на прехранбени производи во БиХ, најави дека планираат развивање синџир на продавници под банерот „БХ базар", кој ќе достигне околу 100 објекти.

Како што објаснија во „Клас", главната визија е да им се помогне на домашните производители да ги пласираат своите производи на полиците во нивните продавници, без никакви дополнителни плаќања. На тој начин, на домашните призводители ќе им биде овозможено своите производи да ги презентираат и да им ги понудат на крајните потрошувачи.

Отворањето на маркетот во октомври 2014 година во рамките на „Босанска тржница" е всушност најава за овој проект. Во овој маркет се продаваат производи кои не можат да се најдат во продавниците што веќе работат во „Босанска тржница".

Русмир Хрвиќ, директор на „Клас", истакнува дека во 2015 година ќе настојува да оствари дополнителен пораст за уште 20 отсто.

Ќе работиме на иновации, маркетинг и унапредување на човечките ресурси во компанијата. „Клас" е еден од нашите најдобри брендови. Силата на брендот ја почувствуваме оваа година кога за кратко време успеавме да ги вратиме нашите производи на продажните полици. Сметаме дека со аквизицијата на „Клас", со знаењето, брендовите и капацитетот што го имаме во „АС Груп", создадена е значајна претпоставка за развој на прехранбената индустрија во БиХ, од примарното земјоделство до позиционирање на силните брендови на полиците, истакна Хрвиќ.