„Клас“ отвора маркет во „Босанска тржница“ во Добриња

Компанијата „Клас" во Сараево отвори маркет во „Босанска тржница" во Добриња. Во маркетот ќе се најдат голем број производи, а асортиманот ќе биде збогатен со домашни производи.

Договор за закуп на уште еден деловен простор во „Босанска тржница" потпишаа началникот на сараевската општина Нови Град, Семир Ефендиќ и директорот на „Клас", Русмир Хрвиќ, соопштено е од општината. 

Според зборовите на Ефендиќ, „Клас" е најголемата домашна компанија со најголем капацитет во БиХ, што се занимава со производство на храна, така што со проектот „БХ базар" (проект за поддршка на домашното производство) ќе им овозможи на сите производители да ги продаваат своите производи во продавниците на „Клас".

„Клас" одлучи да го поддржи овој проект на општината Нови Град. Го препознавме потенцијалот на „Босанската тржница" и на овој начин сакаме да го помогнеме овој проект, што директно работи на развојот на домашното производство и домашното стопанство. За домашните производители најголем проблем е како да дојдат до продажните полици во БиХ и како своите производи да ги претстават и им ги понудат на потрошувачите, рече директорот на компанијата Русмир Хрвиќ.

Хрвиќ истакна дека „Клас", освен овој проект, планира да развие синџир на продавници под името „БХ базар" со околу 100 објекти, а главна визија е на домашните производители да им понуди можност нивните производи без дополнителни плаќања да се продаваат во продавниците на „Клас" .