Кинески производи во БиХ по знамето на Турција

Компании од Турција годишно увезуваат повеќе тони кинеска стока во Босна и Херцеговина, на која не плаќаат данок, со што буџетот на земјата секоја година е оштетен за десетици милиони марки.

БиХ и Турција од 2003 г. имаат договор за слободна трговија, а од 2007 г. е укината и царината на стоката од овие две држави. Оваа погодност ја имаат производите произведени во Турција, но некои турски трговци прават нови пакувања на стока со кинеско потекло и како производ од Турција го пласираат на пазарот на БиХ.

Со ваков проблем се соочува и Турција, иако овој проблем помалку се одразува на нејзината брзорастечка економија. Според истиот пример, и некои компании од БиХ, кои се занимаваат со увоз и извоз, во Турција пласираа околу 3.000 тони ореви, кои според нивните декларации се потекло од Бих, иако се работи за ореви од Украина, Молдавија и Романија. На овој начин избегнато е плаќање на даноци во Турција, во висина од 14 милиони марки.