Свеченоста „Најдоброто од Србија 2014" по единаесетти пат се одржа на 9 јуни во халата „Белекспоцентар". Стопанската комора на Србија (ПКС), Министерството за трговија и весникот „Привредни преглед" ги избраа најдобрите 24 брендови на српскиот пазар за минатата година.
Со изборот и промоцијата на најдобрите придонесуваме за поголема препознатливост на нашите компании и производи и за нивно подобро позиционирање на домашниот и на странските пазари, градејќи слика за Србија како на земја на успешни приказни, рече Марко Чадеж, претседател на ПКС.
Слоганот на годинешниот натпревар гласеше „Најдоброто е во луѓето", а на конкурсот се пријавија 160 трговски и корпоративни брендови.
Во категоријата пијалаци, за најдобар трговски бренд беше прогласено пивото Jelen, а Nectarза најуспешен корпоративен бренд. Најдобра трговска марка е Premia на компанијата „Делез" – Србија.
Дванаесет брендови од категоријата стока за широка потрошувачка добија можност да бидат изложени во посебно одбележан простор во продажните синџири: „Дис", „Меркатор С" („Идеа"), „Веропулос", „Универекспорт", и „Метро кеш &кери". Оваа поддршка на пазарот ја заслужија: Plazma, маслото Iskon, Čuveno Kikindsko brašno, кечапот Polimark, супите Yumis, пивото Jelen, Nectar Life, Ваљевско Пиво, виното Trijumf Aleksandrović, детергентот Merix, омекнувачот Bohor и лепилото Oho.
Победниците имаат право да го користат логото „Најдоброто од Србија" на производите, како знак за квалитет и доверба, на промотивните и на маркетинг-материјалите.
Годинава за првпат беа наградени и две манифестации што ја промовираат Србија како атрактивна дестинација, а тоа беа Belgrade Beer Fest и Меѓународниот земјоделски саем во Нови Сад.
Најдобриот извозник во категоријата мали и средни претпријатија е Институтот РТ РК од Нови Сад, а меѓу големите компании тоа е „Алфа-Плам" со две признанија.
Жељко Сертиќ, министер за стопанство, изрази големо задоволство од резултатите на конкурсот бидејќи, како што истакна, во тие компании работат луѓе кои со своите труд, идеи и таленти создаваат брендови со кои Србија се гордее: Се надевам дека креативните идеи, талентираноста на луѓето и успесите што ги постигнуваат овие компании ќе бидат поттик и за другите претприемачи.
Победниците беа избрани врз основа на три групи критериуми: пазарно-финансиските резултати, перцепцијата на потрошувачите и мислењето на стручното жири. За омилениот бренд годинава гласаа речиси 6.000 потрошувачи и претставници од стручната јавност.
