Извоз преку Србија во Русија може да штети

Хрватската стопанска комора предупреди дека заобиколувањето на руското ембарго може да нанесе повеќе штета од санкциите, не само на поединечните претпријатија туку и на целото хрватско стопанство.

Не смее да се занемари дека меѓународната трговија се темели, меѓу другото, и на потеклото на производите. Поради тоа одредени производи можат да се извезуваат од Србија во Русија ако на пример хрватската компанија има основано или ќе основа фирма и со поголем обем произведува во Србија, се наведува во соопштението на Хрватската стопанска комора, објавено по повод шпекулациите за заобиколување на хрватските земјоделски производи, суровини и прехранбени производи, со извоз преку Србија.

Договорот за слободна трговија меѓу Србија и Русија, кој овозможува повластен извоз на српските производи во Русија, во поглед на правилата за потекло е речиси идентичен со сите останати договори за слободна трговија.

Тоа значи дека за остварување на преференцијалните услови за извоз во Русија исклучиво се гледа стоката да има потекло од Србија. Пакувањето или промената на амбалажата ниту во еден случај не го овозможува статусот на производи со потекло, нагласуваат од Хрватската стопанска комора.