„Имлек“ ги поддржува сточарите

За да го унапреди работењето на кооперантите, „Имлек" вложи повеќе од половина милион евра за нова опрема за складирање и за зачувување на квалитетот на суровото млеко.

Како што беше соопштено од компанијата, набавката вклучува лактофризи со различен капацитет – од тие што се наменети за големите системи со волумен од 10.000 литри, помали од 6.000, 4.000, 3.000 и 1.000 литри, до најмалите од 120 литри, кои ги задоволуваат потребите на малите производители на млеко.

Од „Имлек" истакнуваат дека новата разладна опрема ќе овозможи поефикасно одржување на квалитетот на суровото млеко и на тој начин во голема мера ќе го олесни и дополнително ќе го унапреди целокупниот процес на производство на млечните производи.

Работиме во согласност со европските стандарди, чиишто строги критериуми укажуваат на неопходноста од употребата на најсовремени лактофризи. Партнерските односи со сточарите, нивната едукација и финансиската поддршка, како и инвестициите што „Имлек" континуирано ги вложува во иновации во сопственото производство и преработка на млеко, претставуваат уште една потврда за репутацијата на регионалниот лидер во млечната индустрија, изјави Дарко Самарџија, директор на производни операции во млекарницата.