„Хајнекен“ го зголеми сопственичкиот удел во „Пивоварна Лашко“

Понудата на „Хајнекен" за преземање на „Пивоварна Лашко" ја прифатија 43,49 отсто од сопствениците на акциите, со што холандската компанија го зголеми уделот во словенечката пиварница на 96,92 отсто.

                      

Понудата за преземање на „Пивоварна Лашко" и „Пивоварна Унион", „Хајнекен" ја објави на 17 ноември минатата година, а рокот истече на 15 јануари годинава. Понудата ја прифатија 4.030 сопственици на акции, чиј вкупен удел изнесува 43,49 отсто.

„Хајнекен", кон половината на октомври минатата година, на конзорциумот на продавачи им понуди 25,56 евра за акција. Тогаш, пиварницата доби дозвола за преземање на 53,43 отсто за акција во „Пивоварна Лашко" за 119,5 милиони евра, со дополнителна отплата на долгови. Со тоа стана мнозински сопственик на словенечката пиварница.

„Пивоварна Лашко Унион"

Новите сопственици го именуваа надзорниот одбор и го продолжија мандатот на седум години. Идната заедничка пиварница, со седиште во Љубљана, ќе се вика „Пивоварна Лашко Унион", а за претседател на управниот одбор е именуван Душан Зорко. „Хајнекен" ќе го задржи производството на брендовите Laško и Union.